Evanggelium : Parjamita 10:10-15
* Ngolu dibagasan Panogu-noguion ni Debata*
********************************************
I.
PATUJOLO
Didok di umpama halak
Batak: “Ijuk diparapara hotang
diparlabian, na bisuk nampuna hata na oto tu pargadisan”. Tudosan do nidok
ni i asa mangharingkothon habisuhon. Ala asa unang jumpang haotoon i, asa unang
tu panggadisan angka na oto, adong ma pembalajaran, olo marsiajar tu na
marbisuk, na marroha. Dison ma hinaarga ni habisuhon i. Ala habisuhon na songon
dia do pinangido ni Debata, naeng habisuhon na sian banua ginjang. songon nidok
turpuk jamita on.
II.
Hatorangan turpuk jamita
a.
Hobas pasiding parmaraan
Dijolo ni turpuk on di patorang hasurungan ni halak na
bisuk, halak na ringgas mangalului hapistaran sian halak na oto. Sahalak na
bisuk, molo dung di bereng matultul mata ni tangkena, pisona, parangna jolo
digarut do asa dipangke. Ai molo sai dipangke mata ni tangke naeng matultul na
mangalojai dirina do i, manang manambai lojana. Dipatuduhon i do haotoon ni
sada halak na mamangke tangke naung matultul, ditambai lojana, gabe lambat
sidung ulaonna. Halak na bisuk dipangke habisuhonna mangula ulaonna, gabe ndang
marmara jala ndang loja. Halak na oto, marmara do i ala so dipangke utokutokna dohot
parbinotoanna mangula ulaonna. Tudos na oto i tupanubuti (tukang mantera),
ndang dipangke tabasna, gabe marmara ibana dipargut ulok i. Atik pe adong
hapadeanna pasohon ulok i, ala so dipangke, gabe dipargut ulok i, ima haotoon
ni jolma na adong parbinotoanna, alai ala ndang dipangke. Diula ulaonna, alai
ndang jolo di parade ula-ula sipangkeonna, ujungna loja. Naeng manaha hau sada
halak, alai ndang jolo di garut tangkena i ma halak na mangalojai diri. Diboto
do ndang mamargut ulok i, molo ditabasi, hape ndang ditabasi gabe paro mara.
Tabasanna hian do ulok i unang mamargut, hape ndang dipangke tabasna, ujungna
marmara. Marhite umpama i, ayat 10-11, naeng dohononna, na mangolu di bagasan
panogunoguon ni Tuhan i di pangke parbinotoanna mangula ulaonna, asa marguna
jala berhasil. Asa marguna, marhasil ulaon ni na bisuk, sai jumolo do dihobasi,
diparade ula-ula sipangkeonna, asa unang tamba halojaanna. Alai molo na oto, di
ula ulaonna, ndang diparade ulaula sipangkeonna, loja sambing, jala mangkorhon
parmaraan ala so dipangke parbinotoanna. Ima hangaluton ni halak na oto,
dilojai dirina, ala so tangkas di pingkiri, ndang di parade na ringkot tu
ulaonna (ayat 15)
Adong pepatah Indonesia mandok, “sediakan payung sebelum hujan”. Lapatanna mangarade andorang so ro na hurang
na denggan (bersiap sedia sebelum terjadi yang kurang baik). Boi do pepatah i
mangambarhon ngolu ni sada halak na adong parbinotoanna, alai ndang di pangke
parbinotoanna i, mambahen berhasil ulaonna. Pepatah i patuduhon halembaon ni
sada halak, na so rade managam parmaraan di ngoluna. Boi do songon i halak
Kristen, diboto do hata ni Debata, alai ndang diparhaseang mambahen marguna
ngoluna, dohot pajamothon dirina managam mara lumobi managam uhum na naeng ro.
Halak na mangolu di bagasan pangajarion, panogunoguon ni Tuhan i, i ma halak na
hobas mamangke sinajata haporseaon na nidok ni Ap Paulus di Efesus
6:10-20.
b.
Hata, Pangkulingna
Mangkorhon Las ni Roha di Donganna
Halak na bisuk di gambarhon di ayat 12 sai mamangke hatahatana
gabe las ni roha ni na umbegasa. Hatahata, panghuling ni halak na bisuk gabe
pasupasu di na umbegesa, namambahen masihol donganna mangahatai, umbege
hata-hata manang panghulingna. Alai molo na oto, gabe mamondut dirina sandiri,
manang parohon mara tu dirina. Manang songon halak na malo mandok “mulutmu
adalah harimaumu” lapatanna keselamatan dan harga diri kita bergantung
kepada perkataan kita sendiri. Molo so tangkas piningkiran hata sidohonon,
mangkorhon harugian do i disandok hata i. Ido umbahen didok halak Batak
“Jolo nidilat bibir asa nidok hata” . Jolo tangkas piningkiran aha
pangkorhon ni hata na nidok i, mambahen sogo ni roha do manang las ni roha di
na umbegesa.
Haotoon do mula ni pangkataion ni na oto, godang jala ramos
manghatai. Dihatai na so binotona, jala ujungna hata lalaen. Hata lalaen
lapatanna dihatai na so binotoana, dihatai na naeng masa sogot, alai ndang
diramoti hatana. Ndang dipingkiri aha pangkorhonna, parohon na uli do tu dirina
manang hamagoan. Halak na oto i ma halak na sok tau, di hatai na masa sogo,
dihatai na so binotona. Ndang dipingkiri, aha nanaeng masa sogot tu ibana dung
marujung ngoluna. Jala ndang hea dipingkiri na so adong be na paboahon tu ibana
pangkorhon ni hatahatanai, molo dung marujung ngoluna.
Halak na mangolu dibagasan panogunoguon ni Tuhan i, ima na
mamangke ngoluna, pangkataionna gabe pasupasu di donganna. Taruli pasupasu na
umbage hata ni angka na mangolu dibagasan panogunoguon ni Tuhan i. Dipangke
panghataionna pasangaphon dohot mangarahon jolma mamuji Tuhan i. Dipangke
pangkataionna pasangaphon dohot mangarahon jolma mamuji Tuhan i. Marhite jamita
on disungguli hita asa songon na torop na longang umbege pangajarion ni Tuhan
Jesus (Pat Epistel Lukas 2:41-52). Songon i ma humaliang hita, longang ala
panghataionnta gabe las ni roha na umbegesa. Songon siihuthon Tuhan Jesus hita,
ingkon longang humaliang hita ala pangkataionta mambahen taruli mangkorhon
pasupasu na umbegesa.
III.
Hahonaanna
Turpuk jamita on ima naeng mangajari hita asa mangolu
dibagasan panogunoguon ni Debata. Holan halak na pistar dohot na bisuk do na
olo mangido tu Debata. Anggo na oto i sipata ndang ditanda Debata, jala ndang
hea mangido tu Debata. Asa hita pe naeng pistar marhitehite hata ni Debata na
taguruhon. Di ramoti Debata do angka na marbisuk jala na marroha. Ido umbahen
didok Jesus tu angka siseanNa: Husuru do hamu songon biru-biru tu
tonga-tonga ni angka babiat, dibahen i pantas ma hamu marroha songon ulok,
huhut lidang ma rohamuna songon darapati (Pat Matius 10:16)”. Di
Epistel di minggu on Lukas 2:41-52 dibaritahon do taringot tu Jesus na borhat
tu bagas joro pola dilului natorasNa Ibana, hape didapot natorasNa ma Ibana di
bagas joro i hundul-hundul ditonga-tonga ni angka guru tumangihon hata nasida
huhut manungkunnungkun. Sian i taida jumpang do habisuhon di angka jolma na olo
manangihon huhut rade manungkun. Tiruan na denggan do on tu hitanang di bagasan
partingkian sinuaeng on. Sai olo ma hita manangihon huhut marpanungkun tu
Debata diangka sipangidoanta. Ido tanda ni halak na bisuk di
adopan ni Debata. Amen
Tidak ada komentar:
Posting Komentar